Vawiin ni 26.03.2025 hian Aizawl Smart City Ltd. leh Mizoram Pollution Control Board tangkawpin ‘Training cum Awareness on Common Bio-Medical Waste’ hun an huaihawt a. Smart City project Common Bio-Medical Waste Treatment Plant chu April 1, 2025 atanga a taka hman tawh tur a nih avangin he training /awareness program hi buatsaih a ni.

Vawiin program ah hian Pu CC Lalchhuangkima, Chief Executive Officer, Aizawl Smart City chu Chairman niin Pu H. Lalengmawia, IAS, Commissioner & Secretary, H&FW Dept. leh Chairman, State Advisory Committee ni bawk chu khuallian a ni a. Khuallian chuan Mizoram sorkar leh Aizawl Smart City zarah kan ramin a mamawh em em damdawiin bawlhhlawh bik sawngbawlna hmun kan nei thei ta hi a lawmawm in ropui a tih thu a sawi a. Tun hmaa kan tih thin dana lei hnuaia phum bo (deep burial) emaw a remchan dan anga paih mai a rem tawh dawn lova. A sawngbawlna tur bik hmun kan neih takah chuan Bio-Medical Waste Management Rules, 2016, India ram sorkar siamin a phut ang ngeiin he dan hi kan zawm a ngai tawh dawn a a ni tiin vawiina kal khawmte chu a chah.

Damdawiin bawlhhlawh sawngbawlna hmun tha tak kan neih rualin a nih tur anga kan hman zawh loh a hlauhawm thu a sawi tel bawk. Hmang tangkai turten rinawm tak leh taima takin kan tih tur kan tih a tul dawn a, hotute hnuaia thawk heng bawlhhlawh sawngbawltute pawh uluk taka hrilhhriat a rinawm takin hmun hnaivai leh remchang zawka bawlhhlawhte thehthang mai mai lo turin a chah. Damdawiin, clinic etc ah te hian a paihna tur bik rawng nei (color coded) an sem vek dawn a, in register tawhte chu Code pek an ni ang a heng atang hian dan zawm tha leh tha lote chu an hriat hle dawn a, hremna hi Dan hmangin licence hial inchhuhsak theih a  ni dawn a. Humsual daia licence hloh phah kan awm lohna turin bawlhhlawh te uluk taka thliar a paih turin kalkhawmte a ngen a ni.

 Khuallian thusawi zawhah hian damdawiin bawlhhlawh sawngbawl dan dan leh hrai lam atanga in hriattirna leh zirtirna hun Pi C. Lalmuanpuii, Environmental Engineer, Mizoram Pollution Control Board in a hmang a. Hemi zawhah hian Treatment Plant operate leh enkawl tu tur Pu Mahavir Suthar, BL Engineering chuan Bio-medical Waste facility enkawl dan tur presentation pekna hun a hmang in Pu Lalmuankima, Senor Accounts Officer, Aizawl Smart City in Treatment Plant hman man rate te hrilhfiahna hun a hmang leh bawk. Zawhna leh chhanna hun hman leh niin Pu V. Lalruatliana, Deputy CEO, Aizawl Smart City chuan lawmthu sawina hun hmangin training/awareness program chu tih tawp a ni.