DIPR No.3171/2020-2020
Aizawl, the 17th July 2020 : Vawiin khan Deputy Chief Minister Pu Tawnluia, Urban, Development & Urban Alleviation Department enkawltu Minister ni bawk chuan mipui ke a kalte leh lirthei khalhtuten him leh mumal taka kawng an hman theihna tur Aizawl Smart City Ltd. hmalaknaa Aizawl khawpui hmun 10 laiah traffic light hmanga kawng kanna Pelican Crossing System bun fel chu mipui hman theih turin Treasury Square a Crossing System chu hmet engin mipui hnenah a hlan.
Minister of State for Sports & Youth Affairs Pu Robert Romawia Royte, Aizawl, MLA – Pu Ramthanmawia, Pu C. Lalmuanpuia, Dr. Vanlaltanpuia, Dr. ZR Thiamsanga, Dr. K Pachhunga, Pu H. Biakzaua, Pu Zothantluanga te, Pu PC. Lalhmingthanga, Mayor, Aizawl Municipal Corporation leh Deputy Mayor Pu Lalringliana te pawhin he hun hi hmanpuiin Deputy Chief Minister Pu Tawnluia hi an tawiawm a ni.
Hemi hnuah hian Pelican Crossing System hawnna programme chu Assembly Annexe, Conference Hall hman zui nghal a ni a. Hetah hian Deputy Chief Minister Pu Tawnluia chuan Aizawl khawpui thang zelah Aizawla pemkhawm an pun ang bawkin lirthei a pung nasa a, mumal zawka lirthei tlan dan leh kea kal mipui himna atan kawng hrang hrangin hma lak a nih thu a sawi a. Vawiina hawn tak Pelican Crossing System, Aizawl Smart City Ltd. hmalaknaa hawn chu Aizawl Traffic Management chanchin ah mellung pawimawh tak anih bakah Aizawl khawpui thanna urbanization ngaihtuahin thil tangkai tak a nih ngei a beisei tih a sawi.
Pu Tawnluia chuan Aizawl Smart City Ltd. pianchhuah dan te leh tobul te tarlangin Smart City in a tum ber chu mitin huap innghahna tlak khawpui siam a ni a ti a. Smart City hnuaia hmalakna hrang buaipuitu ber chu UD & PA Department nih mahse Department hrang hrang nen thawk ho tlanga hma lak hoa a a ngaih tur thusawiin Department hrang hrang te tawimawn an hmu that chu lawmawm tiin Smart City hnuaia hnate hi thawh zawh an nih hnuah a Department concerned hrang hrang te hnenah hlan chhawn zel a ni dawn tih a sawi bawk.
Deputy Chief Minister chuan Smart City hnuai ah Project 78 hlawmkhawm niin Project 33 hi State Sawrkar hmalakna, State matching share atana telh a ni thu te, DPR 27 siam zawh tawh a ni a thu te, Project 10 chu tender tawh a ni thu te pawh a tarlang a. Aizawl Smart City Project tihhlawhtlinna atan Central Sawrkarin cheng vaibelchhe 128 a rawn release tawh thu te chung atanga Cheng Vaibelchhe 68 phei chu tun hnai lawkah a rawn release thu te pawh tarlangin Covid-19 avanga harsatna awm mek chungin, chak zawka hna thawk turin theihtawp an chhuah mek tih a sawi.
Pu Tawnluia chuan Aizawl Smart City Ltd. hnuaia thalaite phurpui leh mamawh em em infiamna lam tih changtlun leh khawpui remchanna dang hrang hrang te ngaihpawimawh a nih tur thu sawiin Zemabawk, Durtlang, Chite, Tuivamit, Hlimen leh Edenthar ah te International standard playground nei tur a hmalak mek a nih thu a sawi a. Mizote ngaitnat zawng leh tuihalna phuhruk turin Music City changtlung tak siam tum a nih thu te, Mizoram a la awm ngai lo Urban Landscape mawi tak chu MINECO ah siam a ni tur thu te leh Aizawl New Market pawh changtlung taka sak that tum a niin, chak tak a hmalak mek a ni tih te pawh a thusawi a tarlang bawk a ni.
He hun hmanpuitu dang Mayor, AMC, Pu PC. Lalhmingthanga pawhin thusawiin vawiin thil hawng chu hmasawnna leh khawpui changkang zel in a ken tel a, a kawng neitu mipute himna leh an awlsam zawka tura ruahmanna tha tak a ni, a ti a. AMC chuan Aizawlah kea kal mipui him zawk nan hmun tam taka Pedestrian Footpath te ruahman leh siam mek a nih thu sawiin khawpui a cheng zawng ten mahni zawna theuh khawpui than zelna tur ngaituahna kan sen a pawimawh a ni, a ti.
Programme hi UD&PA Secretary Dr. C. Vanlalramsanga chuan kaihruaiin Pu Lalrothanga CEO, Aizawl Smart City Ltd. hnen atangin Technical Report ngaithlak a ni a. Pu LH. Shanliana, IPS, IGP (Law & Order) pawhin thusawina hun a nei bawk a ni. Programme ah hian Police hotulute, UD &PA Department hotulu leh Aizawl Smart City Ltd. thawktu te an tel a ni.
Pelican Crossing System hi Aizawl khawpui chhunga mipuiten him zawka kawng kan kan theih nan siam a ni a. Kawngpui lun leh mihring tamna lai zel hmun sawmah dah a ni. Traffic Police te’n an control anga, mihring leh lirthei chetvel dan vawng tu tur a ni.
Mipui leh motor khalhtu te tan signal en tur a awm hrang a, mipui ke a kal te tana signal en tur Pelican board-ah mihring lem a sen laiin motor khalh mek tu tana en ve tur traffic signal chu a hring ang a, motor a tlan mek tihna ani a, kawng la kan loh tur a ni. Traffic Police in mipuite kawng kan tul a tih hunah Pelican Board ami chu a hmet ang a, Pelican board ami mihring lem chu a lo hring in traffic signal chu a lo sen ve thung ang a, mipui tan kawng a kan theih tihna a ni ang. Automatic leh Manual a operate theih a ni a. Traffic police lam duh dan in tunah chuan manual a operate tura siam (set) a ni a, duh hunah automatic a siam (set) mai theih a ni.
Attachment
