Dt. 23.10.2021 khan Ministry of Housing & Urban Affairs hmalakna peng pakhat atan Aizawl Smart City Ltd. hmalakna-in Khatla, Chawnga Road, Presbyterian Biak In thlang kawng kual zau laiah Streets for people challenge campaign neih a ni a, kawng kam hmun awl laiah ṭhut hahchawlhna hmun leh naupang infiamna hmunte siamin, a duh tana ei in lamna tur Food Truck te a chhawp a, a mamawh tan BP enna te leh inbukna te a chhawp bawk a ni.

He hmalakna hi Khawpui changkang dangte anga kawngpui kam leh hmun awl remchang lai awm theite mipuite tana hman ṭangkai a nih theih nana inkawhhmuh tumna (campaign) a ni a. Chutiang buatsaih a nih theih nana khawtlang hruaitute leh thuneitu sangte hnena ngaihtuahna thar seng tura infuihna leh inngenna “campaign” a ni nghal bawk a ni.

Aizawl khawpuiah hian kawng kam hmun awl zawng zawng deuhthaw mai chu lirthei hun nan hman a nih deuh vek avangin mi nawlpui tan han chawlh hahdamna tur te, hawi thawvenna tur tha a awm theihnan kan hmun awl kan la neih chhun leh siam belh theih ang angte mipui nawlpuite tana ṭangkai zawka hman a nih  theih nan Aizawl Smart City Limited chuan khawtlang hmunhma neitu, khawtlang hruaitute leh ram hruaitute mai bakah mipuite pawh ngaihtuahna thar senga khawpui nuam leh changkang zawk (Smart City) siampui turin a ngen a, thawhho puiah a sawm a ni.